تعرف على الحديث الودي الذى دار بين السيده انتصار السيسى ونورا حنا ممثلة سيدات الصعيد
نستكمل اليوم سويا حديثنا مع السيده الفاضله نورا سمير حنا التى ،
التى كان لها شرف التكريم من حرم فخامة الرئيس السيسى فى يوم المرأة ، وهى إحدى رائدات إتحاد بشبابها .
أجرى الحوار : على امبابي
سيدتى ماذا عن مادار من حديث ودي بينك وبين السيده إنتصار السيسي سيدة مصر الأولى ؟
سيدة مصر الأولي في خلال تكريمي
واتشرفت بيه من سياداتها وفي الحديث الودي معاها ، قولتلها ان فتيات الصعيد بيقدموا التحية لسيادتك ورحبت جدا .
وكمان كلمتها عن المنتدي وان شاء الله الوقت الجاي كله ، يكون المنتدي في صورة اكبر وبنخرج من منتدي فتيات الصعيد الي منتدي فتيات مصر .
ومنه الي منتدي فتيات العالم وهي منصة حوارية ، تجمع جميع فتيات النجاحات في العالم وتكون مصر هي المنبر ، علي غرار منتدي شباب العالم الناجحة ويقودها فخامة الرئيس عبدالفتاح السيسي .
كيف استقبلتى خبر التكريم ؟
أنا استقبلت الخبر،
الحقيقة الخبر بالنسبالي كان مفاجأة
أنا كنت مندهشة جدا اني اتشاف ، وان الجهود المبذولة الدولة بتقدرها .
وكان امتنان كبير ليا ولمصر والقيادة وشايفة أن كل حد عنده طموح ، وعنده عناصر يقدر ينجح فيها في المجتمع.
– الشعور التاني انا كنت فخورة ببلدي
وخاصة لما شفت الحفل كان فيه صبغة تاريخية كبيرة ، وكان أيضا بيتكلم عن الملكات
وبيتكلم عن المرأة المصرية صاحبة القرار، المرأة المصرية منذ العصور القديمة، وهي قوية وهي ملكة وصانعة حضارة، وكان حاجة تدعو للفخر الشديد
هل تم التواصل مع حضرتك من السيد محافظ المنيا قبل أو بعد مقابلة السيدة إنتصار السيسي ؟
التواصل معايا….هو لم يتم التواصل معايا من المحافظة أو المحافظ للتكريم ، أنا مش عارفة الحقيقة هما عندهم فكرة ولا لا ،
طب وبالنسبة للمجلس القومى للمرأة ؟
اما موقع المجلس القومي للمرأة في القاهرة…هما كانوا معانا لان كانت معانا رئيس المجلس القومي للمرأة
معالي المستشار : امال عمر
لكن المجلس القومي للمرأة في المنيا بردو انا معنديش تواصل معاهم ولم يتم التواصل حتي الآن ،
هل لحضرتك أى دور سياسي حاليا او تسعي للدور السياسي ؟
الجزء اللي انا موجودة فيه في الجزء السياسي ، أنا امين أمانة التنمية المجتمعية المركزية بحزب العدل كما قلت سابقا ، وانا اخترت الأمانة ده لان انا بحب التنمية ، وشغلي كله في التنمية وحتي لما انضميت للحزب السياسي .
وانا مش بتكلم من وجهة نظر سياسي ولكن بناخد كل القضايا السياسية من وجهة نظر تنموية ، وازاي تقدر تأثر علي أرض الواقع وازاي تقدر تغير من مجتمعاتنا ، وده شغفي الحقيقة وكونت منتدي العدل التنموي
والمنتدي خد ٣ نسخ منه كرامة لكل إنسان، بمناسبة اليوم العالمي لحقوق الإنسان ونساء يصنعن القرار وكان بمناسبة المرأة،
وعام المرأة وفي الوقت الحالي برتب للنسخ القادم باذن الله ، سواء من منتدي العدل التنموي أو منتدي فتيات الصعيد
ماهى الخدمات الملموسه والموجودة على أرض الواقع التى تقدم للمرأة فى صعيد مصر ؟
الخدمات التى تقدم للمرأة فى الصعيد .
المبادرات التي تقدمها الدوله للمرأة ، مبادرة ١٠٠ مليون صحه ، مبادرة الكشف عن أمراض الثدي ، بعض المبادرات التى تهم وتخص المراه قد تكون كافية ، لكن فيه عدد كبير جدا من النساء مابيقدروش يقدموا وياخدوا الخدمه .
لكن المشكله هنا ليست فى المبادرات ، المشكله زى ماقال الرئيس السيسي إن مشكلتنا هى مشكلة الوعي ، احنا محتاجين إن السيدات يكون عندها وعي كافى ، يمكن حملة طرق الأبواب يكون لها دور كبير فى نشر الوعي لدى النساء وخاصة بصعيد مصر ، وكمان لو نقدر نوصل لها الخدمات لغاية مكانها ، وفيه خدمات هى المرأة بتضطر تنتقل لها فى أماكن ممكن تكون بعيده.
وده بيكون عائق أمامها للاستفاده من الخدمات دى ، فلو امكن للمجلس القومى للمرأة أو الجهات المعنية بخدمات المرأة يعملوا حصر شامل للسيدات التى لم تتلقى خدمات من نوعيات معينه ، وده ممكن يحصل عن طريق الرائدات الريفيات .
كمان لازم يكون فيه دور توعوي تقوم به الجمعيات والمؤسسات المدنيه والاهليه لأن أجهزة الدوله لن تستطيع أن تتحمل كل هذا العبء لوحدها دون تكاتف ومشاركة المجتمع معها .
طب وما تتمنيه انتى أن يكون موجودا بصفتك إحدى رائدات الحركه النسائية ؟
بالطبع أتمنى أن يكون الطوابير فى المصالح الحكومية ، لايوجد بها عدد كبير من النساء ، وأن تؤدى الخدمات للسيدات بسهوله ويسر .
وذلك على صعيد كل قطاعات الخدمات بالدوله مثل التأمين الصحي ، أو إدارات التموين ، كذلك مقرات الشئون الاجتماعية والتأمينات الاجتماعيه والمعاشات والبنوك ، كذلك اتمنى أن يتم سن قوانين من شأنها التيسير على المرأة العامله ،
ولأنها تقوم بدورها الوظيفى بجانب دورها الأسري من رعاية الأبناء والزوج والمنزل ، وبالأخص السيدات التى لها ظروف خاصه مثل المطلقات أو الأرامل ، أو ماتسمى بالمرأة المعيله .
اخيرا هل كنتى تتوقعي أن يشملك التكريم الذى تم وهل كنتى تسعى إلى ذلك ؟
التكريم الاخير من سيدة مصر الأولى ، حرم فخامة الرئيس انا لم أتوقعه أو أسعى إليه لكنه بلاشك هو أعظم تكريم لي ، ربنا اكرمني بهذا التكريم لانى بجتهد فى عملى .
وبعمل المطلوب مني ومايمليه عليا ضميري سواء فى وظيفتى أو فى بيتى واسرتى ، وعندى قناعه إن ربنا لو أراد لإنسان أن يكون فى مكان ما ، فعلا هيكون في المكان ده .
وده اكيد فى نفع للمجتمع ، يبقى إرادة ربنا ماحدش يقدر ينكرها ولا يغيرها ، لكن انى اعمل العمل ده علشان هدف معين الحقيقه ده هيقلل جدا من قيمة العمل .
وكمان من قيمة اللى بييعمله ، وقيمة الإنسان من قيمة الشيئ اللى بيعمله .
