أحمد كامل يكشف عن الصعاب التي مر بها في مشواره الفني
أحمد كامل يكشف عن الصعاب التي مر بها في مشواره الفني
كتبت: مريم الشافعي
المطرب أحمد كامل يكشف عن الصعاب التي مر بها في بداية مشواره الفني،
وذلك مع التزامن خلال النجاح الكبير الذي حققه بأغنية “لعبتك” التي طرحها مؤخرًا عبر قناة يوتيوب.
حيث نشر أحمد كامل عبر حسابه الشخصي بموقع التواصل الإجتماعي
“فيسبوك” :قائلًا “أنا فاكر كل حاجة زي ما تكون حصلت النهاردة، فاكر لما أسمي أتكتب في ورك شوب بالغلط علشان أتعلم غناء مع إني كنت في البروجيكت، وأنا رابر، ومعرفش هدخل أعمل إيه وهغني إزاي، فاكر أول محاولة إني أغني، وكل الناس معترضة ورفضاني، وبيتريقوا على
اللي ضيعت عمري فيه”.
وأضاف المطرب أحمد كامل: “فاكر لما سبت بيت أبويا وأمي اللي قادرين يصرفوا عليا مال الدنيا
ومن غير دعمهم مكنتش بقيت هنا، وكان حلمي أني أشرفهم علشان مبقاش العيل الخايب اللي في العيلة، وقعدت سنين بعيد عن البيت لحد ما رجعت أحمد كامل الحالي علشان أخترت طريقي بنفسي، ولازم أتحمل العواقب، كنت دايمًا خايف علشان مكبرش قدام أخواتي الصغيرين، وأشوفهم واخدين حد غيري قدوة أو مسنودين على غيري وأنا عاجز”.
وتابع: “فاكر لما سقطت في الجامعة 8 سنين وصحابي كانوا بيعايروني علشان
اتخرجو واشتغلو وأنا صايع ولسة بسقط، وكانوا بعيد على طول السنين وأفتكروني مؤخرًا لما بقيت عايش بالنسبالهم،
أنا فاكر كل كلمة وكل كسرة وكل ليلة نمت فيها محروق دمي من كلام اتقالي،
أو ضحكة خبيثة بتقلل مني وسط الكلام أو من كلمة غنيلنا يا فنان بتريقة”
وأستكمل كامل قائلًا: “والله أنا فاكر كل ليلة من غير عشا وكل ليلة عياط وفقدان أمل،
وفاكر كل فرحة فرحتها، وكل تعب وكل مقابل بعد مجهود، وكل كلمة كتبتها في أغنية،
وكانت من كل قلبي حتى لو صوتي مكانش أحسن حاجة، بس كنت بقول أكيد مش هتخلص على مفيش، فاكر اللي كانو بيستعروا مني علشان تافه في نظرهم، ودلوقتي ناقص يرسموا صوري على صدرهم”.
وفاكر اللي ساعدوني وفاكر اللي خذلوني، فاكر شركات إنتاج روحتلهم ب أغاني ومش عايز أي مقابل، بس يساعدوني أتعرف وأتريقوا عليا ورفضوني”
وأختتم “من وأنا عيل صغير مفيش شيء يحركني قد الغل أو أن حد يستضعفني علشان أنا عارف نفسي كويس،
وعارف قدراتي، هفضل لآخر يوم في عمري بحاول أثبت نفسي كل يوم وأتعلم وأتطور،
وعدت نفسي في يوم وأنا بعيط لوحدي من الحسرة أني ورب الكون ما هخاف أبدًا من بكرة، ومن ساعتها ومادخلش قلبي خوف، أنا فاكر ومش هنسى، اللهم لك الحمد والشكر”.
