اسراب حمام…للشاعر / أحمد إلنجار
اسراب حمام
أحمد إبراهيم النجار
شدي الغطى أحلام كتير
مالهاش وجود متلغبطه
كاسي الضلام
ركام حيطان متهدهده
بصرخ وأنا
ضايع مابين كل الطرق
من كام سنه
مابين عيونك حلم كان
راحل بعيد بلّت
دموعه مخدتك
نازله وماشيه
ع الخدود ومعلّمه
وف صمت ليلك صرختك
وللنعاس مستسلمه
شدي الغطى
مابقاش وجود حبة ندىَ
على وردتك
شدى الغطى
سكن الخريف على شجرتك
والغصن مال واللون صفار
على ورقتك
إتبدلت ضحكتك
نايمه وعايمة فى الصراخ
بحر الدموع عنوان طويل
أوتار فى عود متقسّمه
المزيد من المشاركات
سلّم موسيقي م الحروف
مع صرختك
بتدوي فوق فى الفضا
سامع أنا كل الصراخ
فى غِنوتك
وآه يا نايمة من سنين
بلحاف قديم
شبّاك قديم
جلباب قديم
وطرحتك متقطّعه
شدي الغطى أحلام كتير
مالهاش وجود متلغبطه
راح النهار
من بين جبينك وانتهى
والليل بديل وضلام طويل
غارق على شجر النخيل
سكن الجفاف على ضفتك
والجرح جاري بالألام
على كل غصن م الغصون
أوجاع كتير وبالصراخ متوجّعه
بتحكي كل قصتك
ملعون يا ليل مالهوش نهار
مليان غبار وسواد كثيف
وهدوء مخيف عفريت سخيف
مارد شيطان ومعاه غيلان
نهبه الحبوب من قصعتك
مابقاش خلاص حبة غِلال
لون الخضار أصبح رماد
وسنين عِجاف
متقيدين خطوتك
أحلام كتير متقيّده
شدي الغطى واتبسمي
على حالك الصعب المرير
شدي الغطى واتقلّلبي
على جمر بركانك بويل
شدي الغطى وارسمي
اسراب حمام ومغرّبه
شدي الغطى واكتبي
قصة قطيع
بين الدروب ومشرّده
شدي الغطى أحلام كتير
مالهاش وجود متلغبطه
راح النهار
والليل وساكن ع المدى
شدي الغطى شدي الغطى
