“الأمان عمره ما كان بالبيت ولا الحيطان ولا بالفلوس “
“الأمان عمره ما كان بالبيت ولا الحيطان ولا بالفلوس “
بقلم أخصائي نفسي/نيفين منصور
الآمان هو حضن يضمك وايد تطبطب عليك.
الآمان هو انك تنام مش قلقان ولا خايف عارف انك مسنود
الآمان راحه والفه ومودة.
الأمان قلب يحتويك ويطمنك.
بيوت كتير حلوة من جوه بس شكل فقط، مفيهاش راحه ولا الفه ولا موده بين اهلها، البيت مش حيطان وديكور؛ البيت دفء ومودة وراحه.
فى بيوت فقيرة لكنها غنيه بالأمان، أهلها بينهم محبه وخوف على بعض، بينهم قوة غير عاديه لانهم مسنودين على بعض محدش فيهم متكل ان غيره يشيل، لكنهم كلهم بيشيلوا مع بعض ولو حد فيهم وقع عارف انه مسنود ومطمن إن حواليه ناس بتحبه هتسنده لحد ما يقف تانى، بينهم راحه وسلام مافيش جفاء ولا قسوه محدش فيهم يقدر يستغنى عن التانى ولا يقدر يسيب فرد زعلان متضايق مخنوق، اصل هما عارفين انهم كيان واحد غير منفصل عايشين حياة الشركة كل فرد فيهم بيكمل التانى مفيش عندهم نفسنه ولا غل ولا حقد مفيش بينهم (اشمعني) كل فرد فيهم بيحاول يساعد التانى ينمو ويتطور لان كلهم كيان واحد ونجاح فرد فيهم هو نجاح للكل، بيت هادى كله ضحك ولمه مش كل واحد عايش مع نفسه على تليفونه!
بيخرجوا مع بعض يتجمعوا يوميًا على سفره واحده ياكلوا ويحكوا ويهزروا، يساعدوا بعض فى شغل البيت، بيتهم خالى من الصراخ الدائم والتلكيك والخناق على اتفه الأسباب، بيت مليان بمراعاة مشاعر الاخر، بيت مليان بالقيم والمبادئ، بيت عمران بأشخاص عايشه مع ربنا بالفعل مش بالشكل الظاهرى.
الأمان كلمة كبيره تقدر تبنى بيتك عليها لو قادر تحب بصدق؛ لأن المحبه هى اساس الإحساس بالأمان، لو بتحب هتعرف تدى امان ولو قلبك خالى من المحبه مش هتقدر تبنى اى علاقه فيها امان، ومافيش علاقه هتستمر بدون الأمان.
* الأمان اساس نجاح العلاقات
* الأمان هو حصن التربية السوية
ابدأ من دلوقتى وخلى بيتك مليان آمان علشان تجنى أطفال اسوياء وحياة متوازنه..الآمان له مفعول السحر.
نيفين منصور
اخصائى نفسي
