“الساده أولياء أمور الثانويه العامه.. مهًلا “
لا داعي للخوف والقلق والتوتر..
لازم تكونوا أقوياء، متفائلين، ايجابيين
لا تزعلوا ولا تتهزوا؛ انتوا فاهمين خلاص
وكتير منكم مر عليه ثانويه عامه او اكثر
او حتى في المحيط العائلي بتاعكم، وكل
واحد مش حياخذ الا نصيبه اللي اختاره
ربنا (محدش بيموت ناقص شهاده)
وأمر الله كله خير لو اقتنعتم بكده
وصدقتم في ده وكان ظنكم بربنا يغلب
مخاوفكم (قدموا الرضا).
لازم الامهات يكونوا هاديين من جوه وبره
علشان الاولاد بيستمدوا هدوئهم منكم؛
إن شاء الله محدش حيضيع ولا تعبه
حيروح على الأرض.
ولأولادنا بقول..
(ان الله لا يضيع اجر من أحسن عملا)
تعبك بيدخره ربنا في اتجاه اخر غير الطريق
اللي رسمته لنفسك؛ لأن ربنا عالم بالأفضل لكل
واحد فينا…وأحياناً ربنا بيعلمنا من خلال
الخساره.. خسارة الاهل والأحباب والاصدقاء،
تغيير اتجاه العمل وأهداف الحياه.. بيعلمنا
تقبل خسارة درجات كنت شايف إنك أولى بيها لأن إتجاه التعليم اللي ربنا شايفه انسب مش
محتاج الا درجات معينه.. بيعلمنا التقبل
والمرونه والتفكير بره الصندوق وخارج
القوالب التقليدية للمستقبل .. لازم تبقوا
مؤمنين ان ربنا مابيظلمش حد.. حق كل
واحد حياخده حياخده.. حياخده درجات
ياخدوه تيسير.. تسهيل.. توفيق.. قبول
رزق مادي.. حاجات كتير حتلاقي المعادله
بتظبط أدام عيونك مع الوقت والزمن
وترجع تبص وراك وتفتكر اد ايه كنت
ساذج.. او تفكيرك بسيط ومالكش خبره
لما رجعت منهار من امتحان ولا مقابلة
شغل متوفقتش فيها .. لما تشوف خطط
ربنا ليك اللي اكيد افضل مليون مره من
اللي ترضاه أنت لنفسك.
(انا عند ظن عبدي بي فليظن بي ما شاء)
ومن رضي فله الرضى.
