الشاعرة” انتصار محمد حسين” تكتب ..إضحك انت

انتصار محمد حسين تكتب:

لو ..
لاقيت محدش بيضحك
اضحك انت
لو…
لاقيت الكل يائس
عايش حياته آهات ولوم
عمال يكركب عليه هموم

سيبك انت…
وافرح انت …
وارسم من جديد
أملك انت..
واوعى معاهم تدقق

ولو…
قالوا مفيش أحلام
هتتحقق…
حقق انت… حلمك انت
وقَّوِّي إنت….قلبك انت
واسعِد انت…. روحك انت

وافهم انت …حياتك انت
ده محدش واقف في ضهرك
غير انت..
ولاحد فرحان لفرحك ..
غير انت…

لوعايز تضحك ..
إضحك انت
لو عايز تنجح …
هتنجح انت ..
لوعايز سعادة…
بإيدك انت…
انسى جروحك
و فَّوَّق طموحك
وارسم بكرة
بعيونك انت
ده بر أمانك
بإيدك إنت

وطريق أحلامك
يتحقق قدامك
باصرارك إنت
كمل طريقك
تكسب انت

إسند نفسك … بإيدك انت
وحدك عارف ….قوِّتك انت
وسيبك انت
من أذاهم …

إوعاك تفكر تروح وراهم
كل خطاك هتتقل معاهم
وهيرجعوك تمشي ف عماهم

لو عايز تضحك
..اضحك انت
نفسك تفرح ..افرح انت
ولو هيبكوا ..ماتبكي انت
خلي بكاهم يروح معاهم
واليأس سيبه يتبع خطاهم

وعيش حياتك منغير أذاهم
وانسى اللي كان ..وضاع معاهم
واضحك انت
وافرح انت
وسيبك انت
هي مرة الحياة
عيشها مرة..بفِكرك انت