“الطلاق الصامت” الجزء الأول

“الطلاق الصامت”

بقلم / نرمين الزيات 

يُعتبر الطلاق الصامت؛ آفه بيوت كتير.. يعني الحدوته بتكون عباره عن بيت فيه زوج وزوجه
وأولاد.. الزوج والزوجة مافيش بينهم كلام الا بعض الجمل البسيطه التي لا تُذكر!!
وغير كده مفيش علاقه حقيقيه.. سواء العلاقه الخاصه او التواصل اليومي كطرفين عايشين
مع بعض!

طيب ازاي وصلوا لكده؟! 

ببساطه شديده التعقيد لما تسألهم..

هو هيقول اهو احنا عايشين علشان الأولاد.. أو إحنا عايشين زي بقية الناس.. واهي عيشه واهي
ماشيه..اكل وشرب وشكل إجتماعي أمام الناس،

لكن بينهم او جوه البيت “هيكل مشوه” من علاقه اقل ما يقال عليها..علاقه تجيب المرض لأصحابها
والمحيطين واقصد بيهم (الاولاد) بالذات الأطراف اللي شكل علاقتهم كده.. انه من اول الجواز اتفاجئ لأنه حاطط توقعات في الطرف التاني ومع خلاف وراء التاني وراء الثالث.. بيحصله قفله وبيقرر مع نفسه خلاص نتعامل رسمي ونكمل وخلاص ولان أثناء ده بيبقي في اولاد فالوضع الأضطراري للأسف مكمل.. نقيس علي  ده اي مناسبات احنا شكل بس وديكور من غير علاقه حقيقيه!!

طيب يا تري ايه اللي وصلهم لكده؟! 

 أولاً.. 

من البدايه إحنا داخلين الجواز واحنا طاقتنا
فاضيه معندناش استعداد ندى.. بس عندنا استعداد ناخد.

ثانياً..

بنتفاجيء بقيمنا المختلفة ومش بنحاول نتناقش بمرونه او حتى نتفاوض.

ثالثاً..

توقعاتنا.. انا داخل وعايز من شريكي ده كذا وكذا.. السؤال هنا هل انا عارف انه هايقدر وعارف؟؟

رابعاً..

معلوماتنا عن الجواز صفر.. في احتياجات الراجل والمرأه وتفاصيل كتير عن العلاقه الخاصه والأولاد وتربيتهم.. فبالتالي دنيتنا عبارة عن ضباب!

وعلشان مجتمعياً لازم المركب تمشي بغض النظر مين اللي سايق.. واللي سايق ده شايف ولا لأ  فالجواز بيكمل شكلياَ.. أما فعلياً فهي علاقه محكوم عليها من بداياتها ان فيها حاجه غلط
طبعا ناهيكم عن احاسيس المرأه والراجل انه “بيشتغل متجوز” مش عايش متجوز.. والأولاد ومدي تشوه فكر شكل العلاقات أمامهم لأنهم
المصدر الاول لشكل العلاقات.. فتخيلوا ساعات بعد فترات زمنيه كبيره.. وفجأه طرف بينتفض ويقرر يقول كفايه تعبت.. هنا بنتفاجيء بطريقين هايمشيهم.. إما اللي حواليه يقولوا هو انت لسه فاكر تيجي تتكلم بعد كل ده.. بعد ما أولادكم كبروا لموا الدور بقى وعيب الفضايح!!!
مع انه ولا عيب ولا حرام واللي بينهم ده أكبر من كلمه فضيحه.. وفي اللي يقول عليا وعلى اعدائي لا خلاص مش قادر وبيمشي.. الحل في العلاقات
دي مين هايزهق الاول ومين عنده طاقه يحل ومين ممكن يجرب يقول.. ومالوا ما اجرب ونشوف الحياه وده في الأصل حد شايل خير  اللي أدامه.
ماتزهقوش انكم تقولوا انكم تعبانين، ماتزهقوش واطلبوا مساعده بس مش من العيله.. حد متخصص افضل عشان يبقى بعيد عن الاحكام ويشوف الصوره كامله.. الحياه ممكنه وتستحق ان تُعاش.. وكل اللي علينا.. اننا محتاجين نختار

“نعيشها صح.. بوعي وقصد” 

إنتظرونا في الجزء الثاني..