الفكره الحلال…بقلم/معوض حلمي علي
الفكره الحلال
معوض حلمي علي
إقرأ باسم ربك الغفار
إنت فين ياابن الرساله
اللي ابتدت م الغار
إياك تصدق خدعة الأشرار
وأياك تتوه
لو حزموك برداءة الآفكار
قوم / هات النهار ..
وافتح قلوب الناس
طهرها م الأوزار
يالا اهدم الاسوار
وازرع الفكره
إياك تكون مع دول
أو تمشي يوم ورا دول
إمشي الطريق معدول
واطرح أمان بكره
خلي التاريخ يكتب
عن كنيتك إنسان
لملم جبال الزور
واطحنها ع السندان
وهات خيوط النور
واغزل بها فستان
دا الفكره بنت بنوت
طارحه العسل والتوت
كل اللي جاب الموت
كات فكره بنت حرام
قصر الكلام
إسمع ياخال
من قبل حتى مانتولد
كات البلد قايمه الحداد
ولما جينا نكون مدد
لقينا برضه حدادها زاد
فتح المزاد
مين يشتري ..؟
مين يشتري نهرين جمال
سارحين كدا خفه ودلال
م الجنه سايل نبعهم
دول طعمهم عذب وذلال
مين يشتري ..؟
مين يشتري جرح السنين
والهم والدمع الحزين
ويجيب لي دم يكون ذكي
من صبرا أو من دير ياسين
مين يشتري ..؟
مين يشتري كتاب القراءه
والطهر وعيال البراءه
من مدبحة بحر البقر
والغدر كان سلسال دناءه
مين يشتري ..؟
مين يشتري مني الوريد
ويعيد لي خير زمن الرشيد
العدل عم الكون وساد
فرحوا العباد والزاد مديد
مين يشتري ..؟
مين يشتري عزم العيال
كسروا العدو عدو القنال
هدوا بارليف الحصين
على رمل سينا الدم سال
مين يشتري ..؟
مين يشتري سنين الكفاف
واللقمه كنا ناكلها حاف
وفضلنا إيد تشد إيد زي الجبل
لاهزه ريح ولاعمره خاف
مين يشتري ..؟
مين يشتري الفكره الحلال
ويداوي بيها عقول هزال
ونبقى واحد في الوتين
مش ناس يمين وناس شمال
مين يشتري ..؟
مين يشتري الفكره الحلال
