“اولادي خط أحمر ” ١٥ سؤال لو عندك النيه تكون أب أو أم
“أولادى خط أحمر”
بقلم أخصائي نفسي/نيفين منصور
أولادي خط أحمر، لن اسمح لأحد يأذيهم ولا حتى نفسي.
مبدأ مهم جدا لو عندك النية تكون اب او ام.
هتقرر فكرة الزواج يبقي هنا فى شوية إعتبارات تحطها فى دماغك اهم من الحب الافلاطونى:
1_ هل انت مؤهل تكون اب او انتى مؤهله تكونى ام؟
بمعنى تحمل مسؤلية الأمومة والأبوه والرعاية والتربية للطفل اللي جاى للدنيا مالوش غيركم.
2_ هتعرف تحميه وتدافع عنه وتكون ليه السند؟
( كلامى للزوج والزوجه).
3_ هتعرف تكون ليه الأمان والحضن الدافيء اللي يستخبي فيه لما يتوجع او حتى لما يغلط؟
4_ هتعرف تفيض عليهم مشاعر وحب والحنان اللي محتاجينهم؟
5_ هتعرف تسمعهم ولا هتعيش معاهم بالتسلط والأوامر والنواهى والصح والغلط بدون نقاش؟
6_ هتعرف تعلمهم القيم المهمه اللي هيتعلموها منك لأنك عايشها معاهم ولمسينها منك؟
7_ هتقدر تخليهم فخورين بوجودك معاهم فى حياتهم ولا نافرين من وجودك وتصرفاتك؟
8_ هتحسسهم بقيمتهم وذاتهم الإيجابيه ولاهتخليهم شايفين نفسهم قليلين طول الوقت لأنك موصل ليهم إنهم بالفعل قليلين فى عينك؟
9_هتقدر توفر ليهم بيت دافئ كله محبه وود وضحك ونقاش هادىء ولا عصبيتك وصراعاتك الداخليه بسبب ظروفك او طفولتلك القاسيه تخليك طول الوقت بتفرغ فيهم شحنة غضبك او بتعمل إسقاط لذكرياتك القاسية عليهم؟
10_ هتحب شريك حياتك فعلا وهتحاول تقرب المسافات علشان تحسسهم بالدفا والأمان ولا علاقتك بشريك حياتك هتكون حلبة مصارعه وكل واحد فيكم هيتنافس مين هيكسب بغض النظر عن مشاعر اولادكم؟
11_ هتقدر تحمي أولادك وقت الخطر حتى لو الخطر ده شريك حياتك؟
وهنا ركز فى المعنى المقصود
* يعنى لو لقيتى جوزك بيتحرش ببتك او ابنك هتقدرى تقفى قدامه وتحمى بنتك؟
* لو لقيت زوجتك بتميز الولد عن البنت هتقدر تدافع عن الطرف المظلوم وتوصل لحل حكيم؟
* لو لقيتى زوجك بيتفرج على افلام إباحية مع ابنك هتقدرى تحمى ابنك من ابوه؟
12_ هتقدر تصاحب أولادك وتكون علاقاتكم علاقه صحية كلها إشباعات لإحتياجاتهم؟
13_ هتقدر تفصل مشاكلك مع شريك حياتك عن أولادك وتوصل ليهم صورة متوازنه عنه رغم عيوبه وده لصحتهم النفسيه؟
14_ هتقدر تكون ايجابى معاهم رغم آلمك او صراعاتك فى حياتك ؟
15_ هتقدر تحط مصلحتهم وراحتهم قبل راحتك فى اى قرار فى حياتك ؟
الأبوه والأمومه:
مسؤلية لو مش هتقدر عليها؛ ماتخلفش، خليك صادق مع نفسك من البدايه.
أولادى :
خط أحمر غير مسموح لاى شخص يأذيهم حتى انا.. خليك واعى.
انا:
اخترت اكون أب او أم لكن هما ماختروش مين أهلهم، فأنت المسؤل عن اختيارك.
مش عيب تعترف بخطأك معاهم؛ لكن العيب إنك تتمادى فى الخطأ وتكمل عليه.
نيفين منصور
أخصائي نفسي
