“ببساطه..خليك للي بيحبك!”
بقلم أخصائية نفسيه/نرمين الزيات
إحساسك بالخذلان إنك بيتفرط فيك بكل سهولة؛ إحساس مؤذي جدا مهما حاولت تهونه عليك، مش هاتعرف تشوفه غير إنك بتتاخد علي خوانه في عز أمانك منه!
يمكن اللي هايفرق معاك هنا بس إنه بيساعدك تنساه وبيخليك تشوفوه علي حقيقته اللي طول الوقت أنت مصمم ما تشوفهاش واللي هيه إنه بتاع مصلحته ومزاجه ونفسه بس!
الحقيقة بتوجع بس في وقت لازم نقراها علشان كفاية مش هاتستحمل تاني.
عارفين مش المشكلة في التوقعات لأن صعب إننا في المطلق نعيش من غيرها ده حقيقي، علي سبيل المثال ليا صديقة جدعة وانا معاها علي طول وفي دايرة قريبة لو تعبت أكيد هاتوقع إنها تسأل عليا ..لكن توقعاتنا بتبقي بره الناس دول خالص ..توقعاتنا بتبقي من الناس اللي احنا معتادين منهم الأذي والإهمال بيجي علينا وقت بنتعب ونزهق ونقول أكيد هايشوفونا بقي أكيد هانتقدر بقي!
وهنا نقول جبت التأكيد منين؟؟
عارفين بتبقي لحظه صعبة أوي إننا نتقبل خذلانهم لينا ولأننا كمان معملناش حاجه إلا وكانت حلوة ليهم، لكن لو فكرتم كويس هاتلاقوا بدل الموقف عشرة بانوا فيه وظهرت مواقفهم اللي فيها أنانيه بس بيبقي صعب ساعتها اعترافنا احنا نفسنا إننا مش معقول مفيش حد حوالينا كويس!!
الحقيقة هنا إن بنسبهٍ ما احنا( بنشد ) نفس النمط من الاشخاص اللي هما بيتغذوا من البشر وخدمتهم ..وأنا كمان ابتديت اقنع نفسي اني بتبسط بالناس وانبساطهم وده بيسعدني أكتر وهنا بكون أخترت أحط نفسي علي جنب بعيد أوي!!
أرجع خطوة لورا وشوف الصورة أنت كمان محتاج تتبسط وحد يفكر يسعدك.. إزاي؟
علشان ده حقك علي نفسك وعلي الناس اللي بتسعدهم إنهم يشاركوك فيه.
أقولك خليك للي بيحبك
مش كله يستاهل قلبك
مش الكل يستاهل جدعنتك
مش الكل يستاهل يشوفك شفاف
مش الكل يستاهلك اساسًا!
#ببساطة
#نرمين_الزيات
#اخصائيه_نفسية
