رؤى مصطفى.. حين يتنفس المكان وجدانًا على اذاعة راديو اسرار المشاهير
بقلم : رؤى مصطفى
فى كل مكان بيت أو غرفة أو مكتب أو مدرسة أو محل أو شركة أيا كان إسم المكان
المكان ده ليه ريحة وليه صوت وليه جو وضوء مختلف
المكان ده إرتبط بحالة جوه كل واحد فينا
ياترى إيه سبب الحالة دى؟؟
هل المعطر والديكور ولا إيه ولا إيه؟
لاء مش أى حاجه من دى.
يعنى مثلا بيت جدتك
لو لسه عايشه هتدخل من على عتبة البيت شامم ريحة أكله حلوه هى وبس إللى بتعملهالك بالريحة والطعم ده
هتعدى على سلم هتسمع وإنت طالعه صوت لعبك وضحكك وصريخك وإنت صغير
وشباك السلم إللى بنات العيله بتتلم عليه فوق بعضهم ينموا ويتسامروا
وهتشوف زفة خالك وهو نازل يوم فرحه
وصوت زغاريد مامتك وخالاتك ورقص جدك وفرحته
هتشم ريحة كحك العيد
وتشوف نفسك وصبيان العيله نازلين بصيجان الكحك للفرن
وهتسمع صوت الراديو على برامج او إذاعة هى مابتحولش من عليها
وهتلاقى دولاب فضيه مابيطلعش منه حاجه من يوم ما جدتك إتجوزت بس إتحكالك حدوتة كل قطعه جواه
وهتلاقى دولاب كبير قديم لو فتحته هتشم ريحة عمرك ما تنساها وتفضل فى ذاكرتك لحد آخر يوم فى عمرك
هتلاقى جواه هدوم جدك اللى توفاه الله من عشرات السنين وممكن تلاقى قطعة أو إتنين موروثين من الجد الكبير
هتلاقى نفسك جوه فيلم قديم بس حاسس إنك مثلت فيه دور صغير أوى
هتلاقى شباك بيفتح على جاره.. جدتك بتقعد تتكلم معاها للصبح وكأنك سامع حكاياتهم وإنت فعز نومك
وبراد شاى مادقتش فى طعمه مهما حاولت وجربت
طيب ولو جدتك او أهل المكان مبقوش فيه
برضو هتشوف وتسمح وتشم وتحس نفس الحاجات
طيب إزاى
لأن المكان مش حيطان
المكان أرواح سكناه بذكرياتهم حتى لو مش موجودين
المكان مواقف وحياة وحركة وحواديت فيها روح وريحة وقلوب أصحاب المكان
حتى لو إنت معشتش الوقت ده ولا شفت الناس دى لكن حبيت أصحابه وشفتهم فى حكاوى إللى حبوهم و عاشوا معاهم
هتقدر إنت كمان تحس روحهم فى المكان
والدليل إنك لو فكرت تمحى كل أثر ليهم فى المكان حتى دهان الحيطان
هايفضل إللى عاش الذكريات دى يدخل المكان وهو شايف نفس المكان وشامم نفس الريحه وسامع نفس الأصوات
ومش هتقدر تفرض روح جديده على المكان
إلا لو كنت شخص ليه نفس الروح والقلب والتأثير
ساعتها بس هتقدر تسيب روحك فى المكان للناس إللى هتحبك وتحب أثرك وروحك
يبقى الإنسان هو إللى بيعمل روح للمكان وبيمشى ويسيب روحه فى المكان للناس اللى حبته تعيش على أثرها
حاولوا تعملوا إللى يخلى ليكم روح وذكرى تتساب فى المكان لأولادكم وأزواجكم وأهاليكم وأصحابكم وتلاميذكم
سيبوا أثركم الحلو فى أى مكان علشان تفضلوا عايشين زى اللى مهما عدت سنين جوانا لسه عايشين
وتوته توته خلصت الحدوته
وإستنونى فى حكاية جديده من حكايات أبله فظيعه
