“عارف امتى هتعيش مرتاح؟ ..18 طريقه تكون دليلك لحياة سعيده”
“عارف امتى هتعيش مرتاح؟
18 طريقه تكون دليلك لحياة سعيده”
بقلم/نيفين منصور
أخصائي نفسي
* لما تبطل تعاتب اللي مش حاطك فى حساباته وتبطل تفكر فى ناس مش بتفكر فيك.
* لما تبطل تلوم نفسك على اخطاء مش مقصوده.
* لما تبطل تضحى وتيجى على نفسك علشان حد عمره ما تعب ليك ولا عمره ما كان سند.
* لما تبطل تيجى على مشاعرك علشان شخص قاصد يجرحك طول الوقت ومهما شاف دموعك بيطلعك انت اللي جارحه!
* لما تعرف تواجه اللي زعلك وتعرف تقول لأ لأي تجاوزات تمس كرامتك.
* لما تعرف تعبر عن مشاعرك بدون خوف وتقف على رجلك بعد وقوعك امام ناس مفكرتش تسندك وتقوم لوحدك بدعمك لنفسك.
* لما تعرف تطبطب على نفسك وماتحتاجش تتذلل او تستعطف حد يطبطب عليك او تشحت حد يشوف وجعك ويحس بيك.
* لما تحط نفسك أول اهتماماتك وتتعلم تحب نفسك وتعرف ازاى تراضيها وتفرحها.
* لما توصل لمرحلة الإكتفاء الذاتى وتبنى نفسك بنفسك وتطور وتنجح وتكبر وتشوف نفسك تستحق كل حاجه حلوة.
* لما تعرف امتى تتكلم وامتى تسكت وتتجاهل.
* لما تتعلم ازاى تقود حياتك بنفسك وتتاكد انك شخص غالى وفريد وتستاهل تفرح وتنبسط.
* لما تعرف ترد إهانتك من غير ما تخاف ومن غير ما تجرح كرامة اللي امامك يعنى تعرف تاخد حقك بالأدب.
* لما تعرف ازاى تكون شخص قوى مش قاسى وتعرف تتجاوز صفعات الماضى.
* لما تعرف تتجاوز آلامك الداخليه بدون ما تحس انك ضحية ومن غير ما يوصلك آلمك للإنتقام.
* لما توصل لمرحلة الرضا الكامل عن كل تفاصيل حياتك وعن نفسك وشخصيتك.
* لما تتعلم إن الرضا مش بالحياه الكامله اللي مش ناقصها حاجه؛ لكن الرضا بالإحساس ان اللي عندك مكفيك مش محتاج حاجه من حد ولا بتقارن حياتك بحياة حد.
* لما تكون بتطور نفسك وبتنجح علشان نفسك مش علشان تثبت لحد انك ناجح مش محتاج تدخل سبق مع حد.
* لما تنام وانت مبسوط وفخور بكل اللي حققته ووصلت ليه وفرحان انك قدرت تتحدى نفسك علشان تلاقى نفسك وعرفت تمتن لكل النعم اللي في حياتك وتشكر ربنا عليها.
نيفين منصور
