فاكركم .. ٱنستوني..قصيدة للشاعرة هبة حلاوة
فاكركم .. ٱنستوني..قصيدة للشاعرة هبة حلاوة
المزيد من المشاركات
بقلم :الشاعرة هبة حلاوة
إلى كل اللي حدفوني
ف أغوط بير
وسابوني
إلى كل اللي خذلوني
أشوفكوا بخير
خسرتوني
إلى كل اللي حبوني
عساكم غير
تصونوني
إلى أحلام طفولية
ب لعبة تكون مسلية
ب لبس جديد وب عيدية
ب بنت جيران تكون ليا
وأشيلها ضي ف عينيا
ولما تكون معدية
يرفرف قلبي زي الطير
ينَّسوني
عيونها إتجاه السير
وينْسوني
إلى شلة صحاب مجانين
ومقالب عيال شياطين
ف عم مينا وعم حسين
وباقي جيراننا الطيبين
وجبر خاطر ب كلمتين
ويصبحوا قوام ناسيين
شقاوة ابن عم منير
يسامحوني
ولما يبقى غلطي كبير
يعاتبوني
إلى سنين كتير عدت
وحيطان بيت إتهدت
وشوارع كمان إنسدت
وشوارع تانية إمتدت
ناس قربت وناس بعدت
وناس ع الود إتعاهدت
يسامحوا بعض ع التقصير
إلى كل إيد إتمدت
وساهمت فيا بالتغيير
وحشتوني
فاكركم كلكم بالخير
آنستوني ❤
