ماما فاطمة الجمل والحكاية الأولى وللجمال أنواع

لمياء زكي _ رأس الخيمة 

يجمعنا القدر أحياناً بمنْ تحلو معه الحياة ، بأشخاص عندما  نجالسهم  نتحدث ،معهم ،نسمعهم … لسان حالنا يقول :

” والله مازالت الدنيا بخير ”   هؤلاء منْ يمتلكون سلامة القلب ، وصفاء النية .

وعند مجالستك مع هؤلاء الناس ستشعر برغبتك بأن يتوقف الوقت عند هذه اللحظة التي تتبادلون فيها الحديث ، عند النظرات المطمئنة، عند الإبتسامات المشرقة ، وعفوية الحديث الذي يصدر من القلب ليصل مباشرةً للقلب ، وكان هذا حالي عند مجالستي

 ل ( ماما فاطمة الجمل)   التي دائماً أُحب أُناديها (بماما فطوم )  والتي أحببتُ منها  جملة ( يا عُمري )  التي إن دلت فهي تدل على حنان واحتواء جعلني أشعر بالمودة والأمان والطمأنينة والتي أكدت لي أن هناك من يزرع الورد في دروبه ، ويصنع الجمال لمن حوله …. أعتقد أن السبب في ذلك هو النية الصادقة ، فالنوايا الصادقة ترسم لصاحبها ملامح الخير .

مساء الخير …

مساء النور أهلاً يا عُمري

حضرتك فاضية نقعد مع بعض شوية

يا أهلاً وسهلاً بيكِ تنوري

تشربي شاي..، قهوة ..، عصير ..،

اللي حضرتك هتشربي هشرب معاكِ

أنا هشرب شاي من غير سكر

وأنا كمان

يا الين … أعملي اتنين شاي من غير سكر وهاتيهم على البلكونة

تعالي بقى نقعد في البلكونة … أنا بحب أشرب الشاي في البلكونة

عشان ايه يا ماما فطوم…!؟

عشان بحب الطبيعة الجميلة .. الزرع .. الشجر .. الورود

طيب أنتِ عارفة أنه لا يعشق الورد إلا منْ كان فيه شيء منه

يعني أيه بقى الكلام الحلو ده

يعني حضرتك شبه  الورد …في صفاته

الورود لها صفات خاصة للتعبير   زي الجمال … الرقة  في مخاطبة المشاعر .. الصفاء … التفاؤل  … الود … الأمل … الاشراق

يا سلام كل ده أنا ودي بقى مجاملة ولا بكش

لأ والله دي الحقيقة اللي حساها بكلامي مع حضرتك

حتى اسألي قلبي

هو في زي طيبة قلبك يا لولو

حضرتك جميلة أوي

طيب تقصدي أي جمال بقى

هو في كذا نوع للجمال

طبعاً

زي ايه

في جمال الشكل والملامح وده الشكل اللي ربنا خلق كل واحد منا عليه  خلقة ربنا سبحانه وتعالى  ، وجمال الشكل ده بنشوف منه بدل الشبه أربعين … والشكل ده يا لولو عُمره ما كان مقياس للإنسان

وأيه كمان يا ماما فطوم

في كمان جمال الروح ..، وجمال الروح ده مالهوش شبه …!

يعني ايه …!؟

يعني زي بصمة الإنسان كدة …

عُمرك ما هتلاقي بصمة إنسان تشبه بصمة إنسان تاني

في جملة بتقول : ربّما يكون للوجوه أربعين نسخة ..
‏ولكن تبقى الروح بلا شبيه

وهنا بقى جمال مميز

يعني أيه يا ماما فطوم

يعني الشكل ممكن تجمليه بالمياكب وعمليات التجميل لكن الروح الحلوة حلوة من غير أي تدخل لا جراحي ولا تجميلي

زي ما حسين الجسمي بيقول :

قالوا الجمال في الروح … عشان هي الباقية

وفي جمال الأصل … هنا بتتجسد معاني إنسانية … مش بس شرط يكون من عيلة كبيرة … يكفي أن يكون له معايير وعادات وتقاليد بتتكلم من خلال معاملاته مع الناس .

وفي جمال القلب … الناس اللي قلبها نضيف صافي ما فيهوش لا حسد ولا حقد ولا ضغينة ويحبوا الخير للي حوليهم  .. قلوبهم حنينة مش بتحب تجرح حد … ولو بنظرة

الناس اللي بتمتلك أنواع الجمال دي بتكون ناس راقية .

وحضرتك بصراحة شديدة كدة….  فيكِ كل أنواع الجمال دي

  فيكِ جمال الشكل والروح والأصل والقلب 

ياااه كلهم كلهم

كلهم كلهم

يا عُمري أنتِ

أنتِ بس عشان بتحبيني

مش بس كدة

أومال أيه كمان

لأني شيفاكِ بقلبي يا ماما فطوم

فرؤية العين رؤية

أم رؤية القلب معرفة

ولقاء …

الله .. الله