مفيش حد من الفنانين بيسأل على التاني ليه… و رفضت أخلف ودلوقتي ندمانة تصريحات نجوى فؤاد في برنامج كلام الناس
مفيش حد من الفنانين بيسأل على التاني ليه… و رفضت أخلف ودلوقتي ندمانة تصريحات نجوى فؤاد في برنامج كلام الناس
كتبت: أحلام محمود سيد
حلت الفنانة نجوى فؤاد ضيفة في برنامج كلام الناس، مع الإعلامية ياسمين عز، و الذي يذاع عبر شاشة إم بي سي مصر.
و تحدثت عن حياتها الشخصية و أعمالها الفنية، ومن أبرز تصريحاتها :
-الشعب اللي خلاني نجمة واستمتعت بـ حب الناس ليا، وفي السنوات الأخيرة ندمت أني دخلت الوسط الفني
وضحيت بـ أهلي ودراستي في إسكندرية، وجيت هنا واتجوزت أحمد فؤاد حسن ووقفني على أرض صلبة مع أنه كان أكبر مني بـ 25 سنة.
– رفضت أخلف ودلوقتي ندمانة، وأحمد فؤاد قالي مش هنكمل علشان الخلفة؛
لأني خوفت على جسمي من الخلفة ومكنش فيه عمليات تجميل زي دلوقتي.
– أنا أتبنيت فتاة خريجة حقوق وجوزتها وراحت الحج، ودلوقتي عندها 3 أولاد كبار
وهي اسمها نادية وبتمثل لي كل شيء وعوضتني إحساس الأمومة؛ لأن الأم هي اللي بتربي مش بتخلف فقط.
– حرصت على إن تكون إبنتها بالتبني بعيدة عن الوسط الفني علشان تعيش حياة طبيعية ومش بتسلم على أي حد من الوسط الفني، وربنا يخليها ليا ويسعدها ودايما بتسأل عليا.
كما تحدثت عن علاقتها بالنجمة فيفي عبده،و أعجابها بالراقصة دينا،كما إنتقدت الراقصات الأوكرانيات، و أوضحت أن ملابسهن لا تناسب عادات مجتمعنا الشرقي، بجانب الحديث عن إعجابها برقص فيفي عبده ودينا.
و قالت: فيفي بتسأل عليا وزارتني من سنتين، بس بقت بتقفل التليفونات
ومش بعرف أوصلها، ودينا من أحلى الناس وبتحب الناس كلها، وليها ستايل معين،
ودول اللي بحبهم وبحب أتفرج عليهم في الرقص.
– أنا غضبانة من لبس الراقصات الأوكرانيات، ولازم يكون عليهم رقابة،
ولبسهم كله شبابيك ومفتح ولازم يتوجهوا يلبسوا إزاي لأنهم في مصر،
وهي بلد فيها تقاليد، وهما عندهم عادي بس عندنا لا، وأنا اللي عملت الشيفون على فتحة البطن لأني مكنتش عارفة أرقص باللبس المفتوح دا.
و عبرت عن حزنها و ضيقها من عدم سؤال الفنانين عليها، باستثناء الفنانة نبيلة عبيد، حيث قالت: مفيش حد في الوسط الفني بيسأل على التاني ليه؟
حرام مش عشاني أنا عشانّا كلنا، واحنا اللي بنحب بعض وبنجري ورا بعض وبنتمنى الخير لبعض،
وحبوا بعض هتلاقوا الخير.. والفنانة فيفي عبده آخر مرة سألت عليا من سنة،
واتشغلت بعد كدا بأعمالها الرمضانية، وعدم سؤالهم مش مأثر على حالتي النفسية؛ لأني عارفة أن كل واحد مشغول في أعماله الفنية.
– عائلتي متدينة ووالدي كان نفسه أكمل دراستي ويجوزني ومعندناش مفهوم فن؛
لأنهم شايفين الفن عورة، وكان ساخط عليا بسببه، ولكني كنت أعشق ومازلت أعشق الفن
وعمي كان هيموتني وتراجع بعدما رأى قسيمة زواجي من أحمد فؤاد حسن.
– أنها تزوجت 6 مرات فقط وليس 10 كما يقال، وجميع زيجاتها كانت عن حب ولم تتزوج لأي سبب آخر، وحاليًا تحب القطط فقط.
يذكر أن شاركت نجوى فؤاد، في مسلسل بعنوان أرض النفاق من بطولة الفنان محمد هنيدي،
ومن تأليف يوسف السباعي، وسيناريو وحوار أحمد عبدالله، ومن إخراج سامح عبد العزيز.
كما قامت بتقديم العديد من الأعمال الفنية الناجحة، في الفترة الماضية،
أبرزهم فيلم يحمل اسم قهوة بورصة مصر عام 2019، من تأليف علاء مرسي، وغادة حنفي، ومن إخراج أحمد نور.
