مي كساب تكشف عن تفاصيل أصعب فترات حياتها
مي كساب تكشف عن تفاصيل أصعب فترات حياتها
كتبت: هاجر عبد العليم
ذكرت الفنانة مي كساب أن حكاية “عقبال عوضك”التي قدمتها ضمن سلسلة حكايات مسلسل “زي القمر”، التي قامت ببطولتها وعرضت مؤخرًا، كانت العوض الفني لها بعد صبر 11 سنة.
نشرت الفنانه مي كساب عبر حسابها الخاص على موقع التواصل فيسبوك عن معاناتها قائلة: “الكام يوم اللي فاتوا كانوا أطول مدة أقعدها لوحدي في حياتي، وباعترف شفت الحقيقة الكاملة.
حقيقة نفسي حقيقة كل حاجة حواليها، وعرفت قيمة كل حاجة، وندمت على كل لحظة ظلمت فيها نفسي أو ظلمت حد من اللي بحبهم وبيحبوني.
وتابعت:اللي بتكتب دلوقتي مي بس بتاعة 2010، بس بمخ العشرين سنة اللي اشتغلت فيهم ونجحت وأخفقت بسبب ظروف وأوضاع اتفرضت عليا”.
وأكملت مي حديثها : “بس الحمد لله راضية تمام الرضا على كل ابتلاء وكل مشكلة اتحطيت فيها، لأن في الآخر ربنا سبحانه وتعالى كان بيحلها لي في الآخر عشان أقدر نعمه.
أنا عدى عليا 11 سنة صعبين جدًا، يمكن القريبين مني عارفين أنا استحملت إيه وواجهت إيه.
وتابعت أنا مسحت كل لحظة مش عاوزة أشوفها تاني عشان بتفكرني أني كنت مش أنا، وسببت كل لحظة وكل عمل وكل صورة بتعبر عني وعن اللي جوايا، وعن أكتر حاجات مأثرة جوايا كفنانة وكإنسانة.
ومسحت كل صوري العائلية ولو إن دي مش أنا لحد ما أرجع أنا وأسجل لحظاتي الحلوة مع عيلتي الجميلة، أكبر نعمة من رب العالمين، جوزي وأولادي وأهلي وأصحابي وزملائي رفاق الرحلة الأوفياء الصادقين، السند والضهر اللي خلاني أعرف أعدي الـ 11 سنة دول”.
وأختتمت مي كساب حديثها قائلة: أنا بعترف عقبال عوضك كان عوضي الفني والإنساني بعد صبر 11 سنة، حبيت أفضفض معاكم، وأطلع اللي في قلبي عشان دي أنا.
بأحكي اللي جوايا عشان نيتي بتكون إن اللي مريت بيه يكون مفيد لغيري ويتعلم منه حاجة تأثر فيه وتغيره للأحسن.
وربنا يقدرني وأكون إنسانة صالحة وفنانة صاحبة رسالة وأكون خير في الدنيا، بحبكم من قلبي وحقيقي حبكم ليا هو الحياة.
ويذكر أن مي أعلنت مؤخرًا سلبية المسحة التي قامت بإجرائها، بعد إصابتها بفيروس كورونا، وقضائها فترة العزل المنزلي.
والجدير بالذكر أن حكاية “عقبال عوضك” بطولة مي كساب، ومحمد جمعة ، وإيمان السيد، وهالة فاخر، أحمد جمال سعيد ، ومن إخراج معتز حسام، وتناقش مشكلة “العنوسة” وتأخر زواج الفتاة ونظرة المجتمع لها.
