نهى شكري: لا تتمسك بما يُغرقك.. فالتخلي بداية النجاة على راديو اسرار المشاهير

في زحمة الحياة ومشاعرها المتشابكة، كثير منّا بيعيش متعلّق بحاجة بتوجعه، بشخص، أو ذكرى، أو علاقة خلّت في قلبه أثر عميق، ومع ذلك مش قادر يسيبها. بنفتكر إن التمسّك أمان، وإن البُعد وجع أكبر، لكن الحقيقة إن اللي بيكسرنا مش الفقد… اللي بيكسرنا هو الإصرار على التمسّك باللي انتهى.

ساعات الخوف من الوحدة بيخلينا نفضل في علاقة ميتة، أو في وضع مش مريح، بنقنع نفسنا إن “يمكن يتغيّر”، “يمكن يرجع زي الأول”، أو “يمكن أنا السبب”.. لكن مع الوقت نكتشف إننا بنتفتّت، كل يوم حتة من روحنا بتتكسر، وكل مرة نسكت فيها على الوجع بنخسر نفسنا أكتر.

اللي بيوجعك عمره ما كان سندك، لأن الوجع مش حب، والخذلان مش عِشرة.
الوجع سجن… وانت الوحيد اللي معاه المفتاح.

المفتاح اسمه “التخلي”.

التخلي مش ضعف زي ما ناس كتير فاكرة، التخلي قوة، ووعي، ونُضج.
قوة إنك تختار نفسك من غير ذنب، تختار نورك بدل عتمتك، وتعرف إنك تستحق راحة وسلام.
لأن اللي بيرحل عنك مش دايمًا خسارة… أوقات بيكون بداية اكتشاف حقيقي لنفسك.

كل مرة بتسيب فيها حاجة كانت بتغرقك، بتطلع منك طاقة جديدة، روح خفيفة، وشكل تاني للحياة ماكنتش شايفه قبل كده.
ساعتها تفهم إن الحياة عمرها ما بترجع ورا، دايمًا بتتحرك لقدّام.
ولو فضلت ماسك في اللي خلص، عمرك ما هتشوف اللي جاي.

اختار نفسك.
اختار سلامك.
اختار النور اللي جواك.
واعرف إن كل مرة بتتخلى فيها عن وجع… روحك بتتجلى.

#في_التخلي_تجلي
صباحك إيجابي.. مليان شجاعة وراحة وسلام.

لمشاهدة الحلقة على صفحة اسرار المشاهير 

#صباحك_ايجابى #نهى_شكرى #راديو_اسرار_المشاهير