“يارب يابني ماتقع من ايدين ربنا ابدا” حدث بالفعل

“يارب يابني ماتقع من ايدين ربنا ابداً.. وكل ضيقه تقع فيها يتفتحلك قصادها الف باب”

كتب / دكتور محمد حلمي 

من فتره كنت رايح المستشفي اخلص
ورقه كده..لقيت واحده ست بتطبطب
علي كتفي وبتقولي “ماتعرفش يابني
اعمل الورقه دي منين..انا دايخه ومش
عارفه اروح ولا اجي”.. خليتها تقعد
وروحت خلصتلها اول خطوه م الورق
ده..واخدتها وروحت بيها باقي الاماكن
علشان تخلص باقي ورقها..الحمد لله كنت
في اقل من نص ساعه مخلص لها ورقها
كله..مابقاش فاضل لها غير انها تروح
تستلمه ..الست كل ده كانت ساكته،
مبتسمه بس..وانا ماشي ودعتها وقلت لها
تعمل ايه وسلمت عليها.. جيت امشي
لقيتها مسكتني من دراعي وقالتلي..

“يارب يابني ماتقع من ايدين ربنا أبداً.. وكل ضيقه تقع فيها يتفتحلك قصادها الف باب”

وسابتني ومشيت..ومزودتش ولا حرف
حتي..انشغلت وسط زحمه يومي واسبوع
ورا اسبوع.. شهر..اتنين..سافرت علشان
شغلي ملقيتش اتوبيس..روحت اركب
مواصلات..والحمد لله وصلت..متعود اول
ما أنزل من اي مواصله افتش في جيوبي
واتطمن علي المحفظه والموبايل..نزلت
وانا رايح اركب التاكسي بتطمن علي
الموبايل..موجود الحمد لله.. انما المحفظه
مالقيتهاش..( يانهار اسود!!) دي فيها كل
حاجه.. البطاقه..كروت البنك اللي بقبض
بيها مرتبي..كارنيهات النقابه..رخصه
القياده.. حاجات كتير..كتير اوي كل ما
افتكر هي قد ايه مهمه بحس اني هقع من
طولي..معييش ولا جنيه فى جيبي..في
بلد مش بلدي..مش معايا اي إثبات
شخصيه..موقف صعب و زنقه تاريخيه،
الدنيا اسودت في عينيا..اتقفلت ضبه
ومفتاح .. فضلت افتكر هي وقعت مني
ازاي..قلبت دماغي لحد ما افتكرت..انا
فيا عاده غبيه اوي..هي اني لما اطلع
الموبايل..المحفظه او اي حاجه من جيبي
بسيبها علي رجلي..مابرجعهاش جيبي
تاني..وقفت في موقف التاكسيات مكان
ما نزلت وانا بقول “محفظتي ضاعت!”
لقيت كل السواقين لموا بعضهم وكل اللي
كان حواليا قلبوا الشارع كله تدوير عليها،
المحفظه مالهاش اثر.. سواق تاكسي من
الواقفين لقيته بيقولي اركب..ركبت معاه
وانا مش عارف انا رايح فين..مش شايف
قدامي..لقيته اخدني الموقف..روحت للي
ماسك الموقف وحكيتله..خد مني اوصاف
العربيه وعرف مين السواق..ناس كتير
كانت واقفه بتسمعني ب اهتمام..رغم ان
الموضوع ده كان متكرر يعني عندهم
محفظتك ضاعت.. وايه يعني ياعم ما
بالشفا.. اول ما جاب اسم السواق كأن كل
الموجودين في سباق..كل واحد عاوز هو
اللي يجيب رقم السواق الاول..لحد ما
عرفناه واتصلوا بيه، افتكرني بس ماجاش
الموقف.. وقف هو واللي كانوا راكبين
كلهم دوروا..كل الناس حواليا كانوا
مستنيين انه يلاقيها.. كل سواق يقوله
طب خليه يدور ف كذا..طب يشوف كذا
كلنا متأكدين انه هيلاقيها..لحد ما قالنا انه
مالقهاش..اخدت بعضي من غير ما أتكلم
وشكرتهم ومشيت..طلعت على الشارع
وقولت هاخدها مشي بقي..لقيت عربيه
تاكسي جت وقفت قدامي..لسه هشاورله
واقوله شكرا لقيته سواق التاكسي اللي
جابني الموقف بيقولي انت فين يا استاذ
انا مستنيك من ساعتها علشان اوصلك،
روحت اجيب سجاير لقيت السواقين
قالولي انك مشيت!
قلت له شكرا انا هتصرف..ابتسم وقالي
اركب يا استاذ علشان خاطري..انت في
ضيق والناس لبعضيها..انت لو عاوزني
ارجعك بلدك تاني يلا بينا!
ركبت معاه..وطول الطريق يطمن فيا
ويقولي الخطوات اللي لازم اعملها علشان
الورق ده..واداني رقم تليفونه..وقالي انه
هيرجع الموقف تاني..ويدورلي ويكلمني
لو لقاها..كلمت واحد صاحبي فالمستشفي
علشان ينزلي بفلوس علشان احاسبه..بعد
ما خلصت لقيت وشه قلب..قالي انت
بتشتمني..انت بتضيع عليا ثوابك ليه
ياعم انت.. مش واخد حاجه منك،
بالعافيه لما اقنعته انه ياخد فلوس
وبالعافيه لما خد اقل من اجرته كمان،
سبته ومشيت..دخلت المستشفي وبدأت
اشتغل وانا حرفيا عقلي مش فيا.. شويه
لقيت اختي بتتصل بيا..بتقولي انت
كويس؟.. قلت لها اه..قالتلي انت بطاقتك
معاك؟.. قلت لها انتي عرفتي ازاي هي
ماما لحقت قالتلك؟
قالتلي ماما ايه..فيه واحده كاتبه علي
جروب كبير بنات بس انها لقيت محفظه
ودي صوره صاحبها اللي في البطاقه..!
الدنيا لقيتها نورت فجأه.. ده بجد!!
قلت لها دي محفظتي.. قالت لي ماتقلقش
البنت دي طلعت صاحبتي..اعرفها من ايام
المدرسه..اتطمن وسيبلي الموضوع ده
ومحفظتك هتجيلك لحد عندك.. وفعلاً
رجعت من السفر لقيت المحفظه جاتلي
لحد عندي!

استرجعت الموقف من اوله..لقيت كأن
حاجه بتسلمني لحاجه..كل ماتزنق واقول
اسودت الاقي الف ايد تتمدلي..غصب
عني افتكرت دعوه الست الطيبه اللي
ساعدتها زمان..مشوارها اللي ساعدتها فيه
ومخدتش مني دقايق..وفر عليا حاجات
كتير.. لمجرد اني افتكرتها بس اسودت
الدنيا فعيني..

“يارب يابني ماتقع من ايدين ربنا أبداً وكل
ضيقه تقع فيها يتفتحلك قصادها الف
باب” ☘️

حدث بالفعل..