زي النهارده أنا أبويا مات
كان لسه في بنا حاجات
معملنهاش ولا قولنهاش
على غفلة سابني ومن سكات
يا ريته بس كان حبه عاش
ده العمر بعده راح بلاش
وأنا بس إيه مصبرني بعده
غير انه جوه في قلبى عاش
بعدك مش لاقيه الحنيه
والدنيا بقيت صعبة عليا
محتاجه لحضنك يا حبيبي
يا أغلى من ضي عينيا
من بعدك حاسة إني وحيدة
ولا حاجة في حياتي جديدة
آه يا سندي وضهري يا أبويا
ما فاضلي إلا التنهيدة
ولا صاحب جمبي ولا حبيب
من بعدك ما في حد قريب
ولا إيد تمسح دمعة عيني
ولا في غيرك ليا طبيب
كان حضنك وحده يكفيني
والبسمة دي منك تحيني
وأنا جمبك يابا مالكة العالم
ودلوقتي مين هيهنيني
بنداه اسمك كل شوية
وكوباية الشاي أهي بأديا
وبقولك أنا جيت يا حياتي
وبمليون الف شربه هنيه
واتريني نسيت انك ميت
والحزن بقي ف قلبى مبيت
والبوم عشش ع باب بيتنا
والقلب صبح عايش ميت
يا شقيق الروح قبل ما تروح
كان نفسي ابوس ايدك و أبوح
أنا ليا أنا مين غير حبك مين
يا ساييني بناري وكلي جروح
آه يانا من بعدك يا مراري
مين بس هيعطف على حالي
مين اللي هيسند ضهري ان مال
ومين اللي هقوله أنا اسراري
من بعدك بقى اسمي يتيمة
ولا حاجة في عمري لها قيمة
أنا قلبي وضهري بقى مكسور
والفرحة بقيت موضة قديمة
