أيام وعدت من هنا
حدوتة الحي الكبير أسرار كتير
وعيال وظيطه وظمبليطه
أيام وعدت من هنا
كانت حكاوي جوا القهاوي
حبة حنين علي كام إيدين متشبكه
بيروح دفاها ويا السنين
حدوته أحداثها الحواري ريحة العجين
وأهالي دايمًا شقيانين
وعيون ماليها الشوق هنا
وهناك قلوب متعذبين
وحاجات بسيطة تهزنا
والصحبه والعشره القديمه تلمنا
صوت الآذان وقت الفطار والانتظار
والضحكه واصله للسما
أيام وعدت من هنا
قلبي الضعيف لساه خفيف
ولا مره كان يصدر قرار
واكون خلاص متأكده
لازم يرقرق وارجع احن وابدأ غُنا
خليك هنا طب ليه تصر ع البعاد
وتسيب عيوني سهرانين
أشكيك لمين وأنت المني
بيت جدي كان فيه الدفا جمع قلوبنا كلنا
أول لقاء بعد الرجاء طوّل قوي
محتاجه اسمع صوت حبيبي أنا بنكوي
من غربه احساسها الوجع
اخدت حنين هذا الجدع
وأنا روحي طايره بجناحين قلبي انخلع
طبعاً هتفهم موقفي
عاشقه وبنادي بعلو صوتي وبتلوي
قلبي المقطع كان فتات وبيستوي
ازاي تغازل في البنات وبتدعي
إنك حبيبي يامفتري
وإن الغرام معجون ومنك يحتوي
كداب كبير أصلك
حرير من لمسه بتهد القوي
أنت الكيان وأنا فيك بعافر
لجل احتمي خليك سوي
جرب تشوفني لو لمره وانا ببقا حره
ازاي بحسك في الغياب بالألف مره
عود عيونك نظرتي حسس في طعم محبتي
أنا في الحقيقة قررت أعلن ثورتي
لم الليالي بين إيديك
هتلاقي قلبي بيناديك
وتعالي قولي إننا دوقنا الغرام
وإنك سمعت شكوتي
ازاي يكون شكل اللقا ويا الفراق
وفضلت اللوم انا ع النصيب
إنه مفرق شملنا وأنت متوه سكتي
طب ليه الخصام
تبعت سلام في جواب ورق
وسايبني في النار بتحرق
ازاي تفارق بالسهوله حضني وحياتي ودنيتي
عديت سنيني المحرومين من نظرتك
فابكيت قوي وأنا كنت بذكر رقتك
والضحكه بتغمس دموعي
لما سرحت في لمستك
وبقول لنفسي فوقي يابنتي
دي حاجات قديمه صادفتك
وكمان دي راحت من زمان
أيام ماكان فيه اهتمام
والحب مكتوب ع الحيطان
احساس أمان خاني وبان
وقت احتياجي كان جبان
ملس بأيده ع الببان
من غير ماحتي يقول سلام
ودع غرامي من غير كلام
واهي كلها أيام.
أيام وعدت من هنا.
